ਰੂਸ ਅਤੇ ਯੂਕਰੇਨ ਦੀਆਂ ਫ਼ੌਜਾਂ ਵਿਚਕਾਰ ਜੰਗ ਜਾਰੀ ਹੈ। ਇਸ ਦੌਰਾਨ ਯੂਕਰੇਨ ਦੀ ਫੌਜ ਨੇ ਦਾਅਵਾ ਕੀਤਾ ਹੈ ਕਿ ਉਨ੍ਹਾਂ ਨੇ ਜੰਗ ਦੌਰਾਨ 800 ਤੋਂ ਵੱਧ ਰੂਸੀ ਫੌਜੀਆਂ ਨੂੰ ਮਾਰ ਦਿੱਤਾ ਹੈ। ਯੂਕਰੇਨ ਦੀ ਰੱਖਿਆ ਮੰਤਰੀ ਹੈਨਾ ਮਯਾਰ ਮੁਤਾਬਕ 7 ਰੂਸੀ ਜਹਾਜ਼, 6 ਹੈਲੀਕਾਪਟਰ, 30 ਟੈਂਕ ਨਸ਼ਟ ਹੋ ਗਏ ਹਨ। ਪਹਿਲੇ ਦਿਨ ਯੂਕਰੇਨ ਨੇ ਰੂਸੀ ਲੜਾਕੂ ਜਹਾਜ਼ਾਂ ਅਤੇ ਟੈਂਕਾਂ ਨੂੰ ਡੇਗਣ ਦਾ ਦਾਅਵਾ ਕੀਤਾ ਸੀ।
ਯੂਕਰੇਨ ਨੇ ਦਾਅਵਾ ਕੀਤਾ ਕਿ ਉਸ ਨੇ ਕੱਲ੍ਹ ਨਾਲੋਂ ਅੱਜ ਰੂਸੀ ਫੌਜ ਨੂੰ ਜ਼ਿਆਦਾ ਨੁਕਸਾਨ ਪਹੁੰਚਾਇਆ ਹੈ। ਇਸ ਤਣਾਅ ਦੇ ਸਮੇਂ ਵੀਰਵਾਰ ਨੂੰ ਹੰਗਰੀ ਪੁਲਿਸ ਨੇ ਯੂਕਰੇਨ ਨਾਲ ਲੱਗਦੀ 140-ਕਿਲੋਮੀਟਰ ਲੰਬੀ (85-ਮੀਲ-ਲੰਬੀ) ਸਰਹੱਦ ਦੇ ਨਾਲ ਪੰਜ ਕਰਾਸਿੰਗਾਂ ‘ਤੇ ਹੰਗਰੀ ਵਿੱਚ ਦਾਖਲ ਹੋਣ ਦੀ ਉਡੀਕ ਕਰ ਰਹੀਆਂ ਕਾਰਾਂ ਦੀਆਂ ਲੰਬੀਆਂ ਕਤਾਰਾਂ ਦੀ ਰਿਪੋਰਟ ਕੀਤੀ।
ਯੂਕਰੇਨ ਤੋਂ ਹੰਗਰੀ ਜਾਣ ਲਈ ਵੱਡੀ ਗਿਣਤੀ ਵਿੱਚ ਕਾਰਾਂ ਕਤਾਰਾਂ ਵਿੱਚ ਲੱਗੀਆਂ ਵੇਖੀਆਂ ਗਈਆਂ। ਕੁਝ ਸੈਂਕੜੇ ਲੋਕਾਂ ਨੂੰ ਪੈਦਲ ਸਰਹੱਦ ਪਾਰ ਕਰਦੇ ਦੇਖਿਆ ਗਿਆ। ਰੂਸ ਦੇ ਅਚਾਨਕ ਹਮਲੇ ਤੋਂ ਬਾਅਦ ਯੂਕਰੇਨ ਵਿੱਚ ਲੜਾਈ ਦੇ ਦਿਨ ਲੋਕਾਂ ਦੀਆਂ ਲੰਬੀਆਂ ਲਾਈਨਾਂ ਕੈਸ਼ ਮਸ਼ੀਨਾਂ, ਸੁਪਰ ਮਾਰਕੀਟ ਅਤੇ ਪੈਟਰੋਲ ਸਟੇਸ਼ਨਾਂ ‘ਤੇ ਦਿਖਾਈ ਦਿੱਤੀਆਂ।
ਹੰਗਰੀ ਦੀ ਸਮਾਚਾਰ ਏਜੰਸੀ MTI ਨੇ ਦੱਸਿਆ ਕਿ ਵੀਰਵਾਰ ਨੂੰ ‘ਘੱਟੋ- ਘੱਟ 400 ਜਾਂ 500 ਲੋਕ’ ਪੈਦਲ ਸਰਹੱਦ ਪਾਰ ਕਰਦੇ ਹੋਏ ਹੰਗਰੀ ਪਹੁੰਚੇ। ਪ੍ਰਧਾਨ ਮੰਤਰੀ ਵਿਕਟਰ ਓਰਬਨ ਦੇ ਫੇਸਬੁੱਕ ਪੇਜ ‘ਤੇ ਕੱਲ੍ਹ ਪੋਸਟ ਕੀਤੇ ਗਏ ਨਕਸ਼ੇ ਵਿੱਚ ਕਿਹਾ ਗਿਆ ਸੀ ਕਿ ਬੁਡਾਪੇਸਟ ਦਾ ਮੰਨਣਾ ਹੈ ਕਿ ਹੰਗਰੀ ਵਿੱਚ ਯੂਕਰੇਨ ਤੋਂ ਲਗਪਗ 600,000 ਸ਼ਰਨਾਰਥੀ ਆਉਣਗੇ।