ਇੰਡੀਅਨ ਮੈਡੀਕਲ ਐਸੋਸੀਏਸ਼ਨ ਨੇ ਸੋਸ਼ਲ ਮੀਡੀਆ ’ਤੇ ਵਾਇਰਲ ਹੋਈ ਇੱਕ ਵੀਡੀਓ ਤੋਂ ਬਾਅਦ ਬਾਬਾ ਰਾਮਦੇਵ ਦੇ ਖਿਲਾਫ਼ ਮੁਕੱਦਮਾ ਦਰਜ ਕਰਨ ਦੀ ਮੰਗ ਕੀਤੀ ਹੈ। ਵੀਡੀਓ ਵਿੱਚ ਬਾਬਾ ਰਾਮਦੇਵ ਕਥਿਤ ਤੌਰ ’ਤੇ ਐਲੋਪੈਥੀ ਟਰੀਟਮੈਂਟ ਮੈਥਡ ਖਿਲਾਫ਼ ਬੋਲਦੇ ਹੋਏ ਨਜ਼ਰ ਆ ਰਹੇ ਹਨ।
ਜਿਸ ਤੋਂ ਬਾਅਦ ਸੰਸਥਾ ਨੇ ਇਕ ਪ੍ਰੈਸ ਰਿਲੀਜ਼ ਜਾਰੀ ਕਰ ਕੇ ਸਖ਼ਤ ਕਾਰਵਾਈ ਦੀ ਮੰਗ ਕੀਤੀ ਹੈ। ਦਸ ਦਈਏ ਕਿ ਕੋਰੋਨਾ ਵਾਇਰਸ ਕਾਲ ਵਿੱਚ ਬਾਬਾ ਰਾਮਦੇਵ ਖਿਲਾਫ਼ ਫੈਡਰੇਸ਼ਨ ਆਫ ਰੈਸਿਡੈਂਟ ਡਾਕਟਰ ਐਸੋਸੀਏਸ਼ਨ ਨੇ ਵੀ ਕੋਵਿਡ-19 ਦੇ ਇਲਾਜ ਸਬੰਧੀ ਕਥਿਤ ਟਿੱਪਣੀ ਨੂੰ ਲੈ ਕੇ ਸਖ਼ਤ ਕਾਰਵਾਈ ਦੀ ਮੰਗ ਕੀਤੀ ਸੀ।
ਆਈਐਮਏ ਨੇ ਅਪਣੇ ਪ੍ਰੈਸ ਰਿਲੀਜ਼ ਵਿੱਚ ਕੇਂਦਰੀ ਸਿਹਤ ਮੰਤਰੀ ਹਰਸ਼ਵਰਧਨ ਨੂੰ ਅਪੀਲ ਕੀਤੀ ਹੈ ਕਿ ਉਹ ਵੀਡੀਓ ਵਿੱਚ ਲਾਏ ਗਏ ਇਲਜ਼ਾਮਾਂ ਨੂੰ ਸਵੀਕਾਰ ਕਰ ਦੇਸ਼ ਦੇ ਆਧੁਨਿਕ ਮੈਡੀਕਲ ਸਹੂਲਤਾਂ ਨੂੰ ਭੰਗ ਕਰਨ ਜਾਂ ਫਿਰ ਬਾਬਾ ਰਾਮਦੇਵ ਖਿਲਾਫ਼ ਮਹਾਂਮਾਰੀ ਰੋਗ ਐਕਟ ਤਹਿਤ ਮਾਮਲਾ ਦਰਜ ਕਰ ਕਾਰਵਾਈ ਕਰਨ।
ਇਸ ਬਿਆਨ ਵਿੱਚ ਆਈਐਮਏ ਨੇ ਰਾਮਦੇਵ ਦੇ ਖਿਲਾਫ਼ ਕਾਰਵਾਈ ਨਾ ਕੀਤੇ ਜਾਣ ’ਤੇ ਕਾਨੂੰਨੀ ਕਾਰਵਾਈ ਕਰਨ ਦੀ ਧਮਕੀ ਦਿੱਤੀ ਹੈ। ਦਸ ਦਈਏ ਕਿ ਵਾਇਰਲ ਵੀਡੀਓ ਵਿੱਚ ਕਥਿਤ ਤੌਰ ’ਤੇ ਬਾਬਾ ਰਾਮਦੇਵ ਨੇ ਕਿਹਾ ਸੀ ਕਿ, “ਮਾਡਰਨ ਐਲੋਪੈਥੀ ਇਕ ਅਜਿਹੀ ਸਟੁਪਿਡ ਅਤੇ ਦੀਵਾਲੀਆ ਸਾਇੰਸ ਹੈ।”
ਆਈਐਮਏ ਨੇ ਇਹ ਵੀ ਕਿਹਾ ਕਿ, ‘ਰਾਮਦੇਵ ਇਕ ਯੋਗਗੁਰੂ ਹੋਣ ਤੋਂ ਇਲਾਵਾ ਇਕ ਫਾਰਮਾਸਿਊਟਿਕਲ ਯੂਨਿਟ ਦੇ ਕਾਰਪੋਰੇਟ ਦਿਗਜ਼ ਹਨ। ਉਹ ਜਨਤਾ ਨੂੰ ਗੁੰਮਰਾਹ ਕਰਨ ਲਈ ਅਪਣੀ ਕੰਪਨੀ ਉਤਪਾਦਾਂ ਬਾਰੇ ਕਈ ਵਾਰ ਝੂਠ ਬੋਲਦੇ ਦੇਖੇ ਗਏ ਹਨ।’